Ráðgjöf

VIÐURKENNING Á MENNTUN OG STARFSREYNSLU FRÁ ÖÐRU LANDI

Í því skyni að sækja um viðurkenningu á menntun og starfsreynslu frá öðru landi á Íslandi þarf að skila inn nokkrum skjölum. Grunngögnin eru eftirfarandi:

1. Afrit af lokaprófskírteini á upprunalegu tungumáli, stimplað af fulltrúa viðkomandi skóla eða öðrum viðurkenndum aðila. Brýnt er að ljósrita allt   prófskírteinið til að tryggja að fram komi inntak námsins (upptalning námsgreina) og umfang þess í árum talið miðað við fullt nám.
2. Þýðing á prófskírteininu á íslensku eða ensku.
3. Staðfestar upplýsingar um reynslu umsækjanda af störfum innan viðkomandi starfsgreinar.
4. Staðfesting á starfsréttindum einstaklingsins í viðkomandi landi þegar við á.

Hafa ber í huga að ofangreindur listi er ekki tæmandi. Dæmi eru um að óskað sé eftir fleiri gögnum vegna ákveðinna starfa.  Engu að síður er mælt með að ofangreindum gögnum sé skilað inn til að byrja með. Ef þörf reynist á frekari gögnum er viðkomandi látinn vita og fær frest til að afla og skila frekari gögnum.

Að neðan er listi yfir í hvaða tilvikum (störfum) íslensk löggilding er gerð að skilyrði fyrir því að viðkomandi sérfræðingur megi starfa hér á landi. Viðkomandi starfsheiti fylgja upplýsingar um hvaða ráðuneyti viðkomandi starfsgrein heyrir undir og upplýsingar um umsjónaraðila löggildingarinnar í viðkomandi undirstofnun þegar við á. Sumar undirstofnanirnar gera kröfu um að fyllt sé út eyðublað og skilað til stofnunarinnar ásamt fylgigögnum. Aðrar undirstofnanir gera aðeins kröfu um að skrifað sé einfalt umsóknarbréf með ósk um löggildingu hér á landi.

Dæmi um einfalt bréf er:  Hér með sækir undirritaður (undirrituð) um viðurkenningu á því að hann (hún) megi nota starfsheitið ... (viðkomandi starfsheiti). Ég er fædd(ur) í ... (nafn lands og borgar) þann ... (dagsetning) en flutti til Íslands þann ... (dagsetning) og bý í dag í ...(sveitarfélagi). Ég hef lokið námi til ... (nafn starfheitis) og hef unnið sem slík(ur) í ...(fjöldi ára) í ...(nafn viðkomandi lands). Meðfylgjandi þessari beiðni eru viðkomandi prófskírteini ásamt þýðingu á ...(ensku/íslensku), staðfestingu á starfsreynslu og staðfestingu á því að mega nota starfsheitið í ... (nafn viðkomandi lands).

Ef um ólögvarið starfsheiti er að ræða þá þarf ekki að sækja um sérstakt leyfi til að mega vinna við starfið eða nota starfsheitið. Í flestum tilfellum dugar samkomulag á milli starfsmanns og vinnuveitanda. Þeir sem samt sem áður vilja fá menntun sína metna til að geta t.d. haldið áfram námi í viðkomandi sérgrein geta sett sér í samband við Íslenska ENIC/NARIC upplýsingaskrifstofuna sem veitir upplýsingar um mat á námi með tilliti til inntökuskilyrða í háskóla. Hægt er að hafa samband við upplýsingaskrifstofu sem er til húsa í Háskóla Íslands, Háskólatorg - Sæmundargata 4, 101 Reykjavík gegnum vefsíðu hennar á https://enic-naric.hi.is/.